اسلام آباد۔7جون (اے پی پی):وزیر اعظم عمران خان آکھیے جو ملک کوں پولیو توں نجات ݙیواوݨ اساݙا مشن اے ،وفاقی اتے صوبائی حکومتاں دی مربوط اتے سانجھیاں کوششاں توں ہی پاکستان کوں پولیو فری بݨایا ونڄ سڳدے، جیویں کورونا وبا کوں نبݨیے سے ایجھے جذبے نال ہی پولیو کوں ہراوݨاں اے ۔ اے ڳالھ انہاں سنوار کوں قومی ٹاسک فورس انسداد پولیو دے اجلاس دی صدارت کریندے ہوئیں آکھی اے ، اجلاس اچ گورنر خیبر پختونخوا شاہ فرمان، وزراء اعلی سردار عثمان بزدار، سید مراد علی شاہ، محمود خان، محمد خالد خورشید، معاونین خصوصی ڈاکٹر فیصل سلطان، ڈاکٹر شہباز گل، انجنیئر ان چیف پاکستان آرمی لیفٹننٹ جنرل معظم اعجاز، صوبائی چیف سیکریٹریز، وزارت صحت اتے بین الاقوامی اداریں دے نمائندیں شرکت کیتی ،اجلاس کوں ݙسایا ڳئے جو وفاقی اتے صوبائی حکومتاں دی موثر حکمت عملی پاروں ہݨ تئیں ایں سال پورے ملک اچ بلوچستان توں صرف ھک پولیو کیس رپورٹ تھئے ۔ کرونا وباء دی وجہ توں انسداد پولیو مہم تکھے نہ چل سڳی۔ اجلاس کوں ݙسایا ڳیا جو پنجاب، سندھ اتے خیبر پختونخوا دے کئی ضلعیں اچ حالی وی پولیو وائرس دی موجودگی دے شواہد ملین ۔ ݙسایا ڳئے جو رسائی، سیکیورٹی اتے ما پیو دے عدم تعاون دی وجہ توں ہر مہم اچ وݙی تعداد اچ ٻال پولیو دے قطرے توں محروم رہ ویندن ۔
